គ្រូបង្វឹកលោតឆ័ត្រយោងម្នាក់ ត្រូវបានស្លាប់បាត់បង់ជីវិត ក្រោយលោតឆ័ត្រយោងខុសបច្ចេកទេស !
btshotnews
កំពង់ស្ពឺ ៖ យោងតាមផេកហ្វេសប៊ុកចំនួន២ ដែលមួយ គឺជាអតីតសិក្ខាកាមឆ័ត្រយោងជំនាន់ទី២២ (PARA22)និងមួយទៀត គឺជាសមាជិកទ័ពឆ័ត្រយោង ជំនាន់ទី២៣ បានបង្ហោះសារដ៏ក្ដុកក្ដួលសម្ដែងនូវការសោកស្ដាយចំពោះ លោកគ្រូ លឹម សាយ គឺជាគ្រូបង្វឹកលោតឆ័ត្រយោងមួយរូប ដែលបានលោតបានស្លាប់បាត់បង់ជីវិតនៅក្នុងបេសកកម្មលោតឆ័ត្របញ្ជា ( Free Fall ) ក្នុងការបិទវគ្គហ្វឹកហ្វឺនជំនាញកុម្ម៉ង់ដូ ជំនាន់ទី១០ វគ្គហ្វឹកហ្វឺនជំនាញឆ័ត្រយោងជំនាន់ទី២៩ និង បើកវគ្គហ្វឹកហ្វឺនជំនាញឆ័ត្រយោង ជំនាន់ទី៣០ នៅសាលាហ្វឹកហ្វឺនទ័ពពិសេស តេជោសែនឱរ៉ាល់ ខេត្តកំពង់ស្ពឺនៅថ្ងៃទី១៤ ខែមករា ឆ្នាំ២០២១នេះ ។
គណនីហ្វេសប៊ុកទី១ ឈ្មោះ «Hoeun SoPhorn» បានបង្ហោះរូបភាពលោកគ្រូលឹម សាយ អមដោយសារខ្លីថា «ខ្ញុំបាទក្នុងនាមជាអតីតសិក្ខាកាមឆ័ត្រយោងជំនាន់ទី២២ PARA22 ពិតជាមានការសោកស្តាយយ៉ាងខ្លាំងបំផុតចំពោះលោកគ្រូ លឹម សាយ ដែលបានទទួលមរណភាព សូមលោកគ្រូទៅកាន់លោកខាងមុខ» ។
រីឯហ្វេសប៊ុកទី២ ឈ្មោះ «សឹង្ហ ជ័យ» ក៏បានបង្ហោះរូបភាពលោកគ្រូលឹម សាយ អមដោយសារខ្លីដូចគ្នាផងដែរថា «ក្នុងនាមជាសមាជិកទ័ពឆ័ត្រយោងជំនាន់ទី២៣ សូមចូលរួមសោកស្ដាយជាទីបំផុតចំពោះការបាត់បង់ លោកគ្រូ លឹម សាយ ដែលបានពលីក្នុងបេសកកម្មលោតឆ័ត្របញ្ជា ( Free Fall ) នេះគឺជាការបាត់បង់នូវធនធាន ការពារជាតិ គ្រូបង្វឹកដ៏ល្អ មានបទពិសោធន៍ ចំពោះកងយោធពលខេមរភូមិន្ទ ខ្ញុំសូមបួងសួងឲ្យវិញ្ញាណក្ខន្ធលោកគ្រូ ទៅកាន់សុគតិភព» ។
តាមប្រភពព័ត៌មានបានឲ្យដឹងថា លោកគ្រូលឹម សាយ បានជួបគ្រោះថ្នាក់ដល់អាយុជីវិតខណៈពេលដែលលោកលោតឆ័ត្រខុសបច្ចេកទេស ដោយការទាក់ខ្សែគ្នា ហើយក៏ធ្លាក់ចុះមកដីបណ្ដាលឲ្យស្លាប់តែម្ដង ៕
