ផ្ទុះមីនតោនបណ្ដាលឲ្យមនុស្ស២នាក់រងរបួសនិងគ្រឿងចក្ររងការខូចខាតខណ:ពេលកំពុងជីកស្រះ !

btshotnews
ឧត្តរមានជ័យ៖ យ៉ាងហោចណាស់បុរស២នាក់បានរងរបួសធ្ងន់ស្រាល ត្រូវបានគេបញ្ជូនទៅសង្រ្គោះភ្លាមៗនៅឯមន្ទីរពេទ្យ ចំណែកគ្រឿងចក្រមួយគ្រឿងបានរងការខូចខាត ក្នុងហេតុការណ៍ផ្ទុះមីនតោនកាលពីយប់ថ្ងៃទី១៣ ខែកុម្ភះ ឆ្នាំ២០២១ ម្សិលមិញនេះ ស្ថិតក្នុងភូមិលំទងចាស់ ឃុំលំទង ស្រុកអន្លង់វែង ខេត្តឧត្តរមានជ័យ។

មន្ត្រីនគរបាលស្រុកអន្លង់វែងបានឲ្យដឹងនៅព្រឹកថ្ងៃទី១៤ខែកុម្ភះឆ្នាំ២០២១នេះថា មុនពេលកើតហេតុ ជនរងគ្រោះបានបើកគ្រឿងចក្រមួយគ្រឿងប្រភេទអេស្កាវ៉ាទ័រសុីឈ្នួលជីកស្រះឲ្យគេ ស្របពេលដែលកំពុងបញ្ជាគ្រឿងចក្រកាយដី ស្រាប់គ្រឿងចក្របានកិនចំមីនតោនធ្វេីឲ្យផ្ទុះកក្រើកឡើង បណ្តាលឲ្យអ្នកបើកបរគ្រឿងចក្រនិងម្ចាស់ស្រះដែលកំពុងឈរមើលរងរបួស ។ ភ្លាមៗនោះត្រូវបានគេបញ្ជូនទៅធ្វើការសង្រ្គោះនៅឯមន្ទីរពេទ្យបង្អែកស្រុកអន្លង់វែង ចំណែកគ្រឿងចក្រម៉ាកអេស្កាវ៉ាទ័របានដាច់ច្រវ៉ាក់រងការខូចខាតធ្ងន់ធ្ងរ។

មន្ត្រីនគរបាលបានបញ្ជាក់ឲ្យដឹងទៀតថា ជនរងគ្រោះជាអ្នកបើកគ្រឿងចក្រមានឈ្មោះ លេខ ឡី ភេទប្រុសអាយុ១៦ឆ្នាំ រស់នៅភូមិរលំស្វាយ ឃុំជន្លាសដៃ ខេត្តសៀមរាប រងរបួសស្រាល ចំណែកម្ចាស់ស្រះឈ្មោះស៊ុម តង ភេទប្រុសអោយុ៤២ឆ្នាំ រស់នៅភូមិឃុំកើតហេតុខាងលើ រងរបួសកំភួនដៃនិងត្រូវអំបែងតូចៗពេញខ្លួន កំពុងសម្រាកព្យាបាលនៅមន្ទីរពេទ្យ៕