ប្រធានមន្ទីរសុខាភិបាលនៃខេត្តព្រះវិហារ ណែនាំដល់អ្នកប្រកបរបរអាជីវកម្មវេជ្ជសាស្ត្រឯកជនតាមបណ្តាស្រុកនានា ត្រូវរាយការណ៍ជាបន្ទាន់ ក្នុងករណីសង្ស័យប្រជាពលរដ្ឋមានរោគសញ្ញាCOVID-19

btshotnews
ព្រះវិហារ៖ លោកវេជ្ជបណ្ឌិត គួង ឡូ ប្រធានមន្ទីរសុខាភិបាលនៃខេត្តព្រះវិហារ បានថ្លែងណែនាំដល់អ្នកប្រកបអាជីវកម្មវេជ្ជសាស្ត្រឯកជននៅតាមក្រុង ស្រុកនានាក្នុងខេត្ត ត្រូវសហការជាមួយ មន្ទីរសុខាភិបាលខេត្ត ដោយរាយការណ៍មកជាបន្ទាន់ ក្នុងករណីសង្ស័យថា មានប្រជាពលរដ្ឋក្នុងមូលដ្ឋានរបស់ខ្លួនមានរោគសញ្ញាវីរុសកូរ៉ូណា ឬ Covid-19។
ការថ្លែងណែនាំរបស់លោកប្រធានមន្ទីរសុខាភិបាលខេត្តព្រះវិហារបែបនេះ ក្នុងគ្រាដែលលោក និងសហការី អញ្ជើញចុះអប់រំផ្សព្វផ្សាយស្តីពីជំងឺ Covid-19 ដល់អ្នកប្រកបអាជីវកម្មវេជ្ជសាស្ត្រឯកជន នៅតាមបណ្តាស្រុក៤ ក្នុងនៃខេត្តព្រះវិហារ រួមមាន៖ ស្រុកជាំក្សាន្ត ស្រុកគូលែន ស្រុកជ័យសែន និងស្រុកឆែប កាលពីថ្ងៃទី១១ ខែមីនា ឆ្នាំ២០២០ ម្សិលមិញនេះ។
លោកវេជ្ជបណ្ឌិត គួង ឡូ បានថ្លែងឲ្យដឹងទៀតថា ការចុះអប់រំផ្សព្វផ្សាយស្តីពីជងឺ Covid-19 នេះ គឺមានការចូលរួមពីអ្នកប្រកបអាជីវកម្មវេជ្ជសាស្ត្រឯកជន មកពីស្រុកជាំក្សាន្តចំនួន ៣០សេវាឯកជន ស្រុកគូលែនចំនួន ៣១សេវាឯកជន ស្រុកជ័យសែនចំនួន ១៥សេវាឯកជន និងស្រុកឆែបចំនួន ១៧សេវាឯកជន ហើយការផ្សព្វផ្សាយនេះ ចង់ឲ្យពួកគាត់ជួយផ្សព្វផ្សាយបន្ត និងសហការជាមួយមន្ទីរសុខាភិបាលខេត្ត ក្នុងករណីសង្ស័យមានរោគសញ្ញាជំងឺ Covid-19 ត្រូវរាយការណ៍មកមន្ទីរសុខាភិបាលខេត្តជាបន្ទាន់។
លោកបានគូសបញ្ជាក់ទៀតថា ដោយអនុវត្តន៍តាមការណែនាំរបស់លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងលោក ប្រាក់ សុវណ្ណ អភិបាលខេត្តព្រះវិហារ មន្ទីរសុខាភិបាលខេត្ត បានចុះអប់រំផ្សព្វផ្សាយដល់អ្នកប្រកបសេវាសុខាភិបាលឯកជន នៅតាមស្រុកនានាក្នុងខេត្ត និងបានចុះអប់រំផ្សព្វផ្សាយស្តីពីជំងឺ Covid-19 ដល់បងប្អូនប្រជាពលរដ្ឋនៅតាមភូមិ ឃុំនានាក្នុងខេត្តឲ្យ ពួកគាត់ បានយល់និងមានវិធានាការការពារទៀតផង៕